करिब २१ लाख नगदसहित हुन्डी कारोबारमा संलग्न चिनियाँ नागरिक पक्राउ

काठमाडौँ। हुन्डी कारोबारमा संलग्न एकजना चिनियाँ नागरिक २० लाख ९२ हजार रूपैयाँसहित पक्राउ परेका छन् । बुधबार बेलुका साढे ५ बजेको समयमा काठमाडौंको महाबौद्धमा हुण्डी कारोबार भइरहेको सूचनाका आधारमा प्रहरी वृत्त जनसेवाको टोलीले उनलाई उक्त परिमाणको रकमसहित पक्राउ गरेको हो ।

पक्राउ पर्नेमा चीनको तिब्बत निावसी २६ वर्षीया रिक्से वाङ्मो रहेको जिल्ला प्रहरी परिसर काठमाडौंका प्रवक्ता एसपी अपीलराज बोहोराले बताए । बोहोराका अनुसार उनी स्थायी रुपमा भारतको हिमाचल प्रदेशस्थित जोगिन्दरनगरको सुजा गाउँमा बस्दै आएका थिए ।

उनलाई काठमाडौं जिल्ला अदालतबाट ४ दिनको म्याद थप गरेर अनुसन्धान भइरहेको छ। उनको साथबाट १ हजार दरको ११८३ थान जम्मा ११ लाख ८३,००० हजार रुपैयाँ, ५०० दरको नोट थान १८१८ जम्मा ९ लाख ९ हजार रुपैयाँ बरामद भएको छ । त्यसैगरी आईफोन एकथान पनि बरामद भएको प्रहरीले जनाएको छ।