प्रचण्डको ब्रान्ड भ्यालु राम्रो छ : वर्षमान पुन

काठमाडौं : माओवादी केन्द्रका उप-महासचिव वर्षमान पुनले पार्टी अध्यक्ष पुष्पकमल दाहाल प्रचण्डको ‘ब्रान्ड भ्यालु राम्रो रहेको दाबी गरे।

पार्टी सम्बद्ध अखिल क्रान्तिकारीले शनिवार राजधानीमा गरेको कार्यक्रममा पुनले प्रचण्डले आफूलाई रूपान्तरण गर्न भने जरुरी रहेको बताए।

‘हामी अध्यक्ष प्रचण्डको नेतृत्वमा एकताबद्ध र गोलबन्द छौँ। प्रचण्ड परिवर्तनको राजनीतिको ब्रान्ड हो, हामीले उहाँलाई ब्रान्डका रूपमा स्थापित गरेका छौँ। उहाँको ब्रान्ड भ्यालु राम्रो छ।’

पुनले पटक पटक मन्त्री, सांसद भएका र दशक अघिदेखि पार्टीको महत्त्वपूर्ण भूमिकामा रहेका नेताहरूले बिग्रिएको जति दोष प्रचण्डको थाप्लोमा हालेर उम्किन नपाउने बताए।

‘हामी कोही अर्थमन्त्री, कोही गृहमन्त्री, कोही ऊर्जामन्त्री, कोही विभिन्न खालका मन्त्री भएका छौँ। मन्त्री हुँदा या सांसदमा हुँदा, पार्टीको उपाध्यक्ष, महासचिव, उपमहासचिव, सचिव विभिन्न जिम्मेवारीमा छौँ,' उनले भने 'पार्टीलाई राम्रो बनाउने हाम्रो पनि दायित्व हुन्छ। हामीले सरकार र संसद्मा हुँदा के राम्रा नराम्रा गर्यौँ ? गर्न हुने र न हुने गर्यौँ ? हामी आफूतिर पनि फर्कन तयार हुनुपर्छ।'

दोस्रो तहका नेताहरूले पहिलो र पछिल्लो पुस्ताबीच समन्वय र सन्तुलन मिलाएर पार्टीलाई गतिशील बनाउने भूमिका खेल्नुपर्ने उनले बताए ।