जेलमा रहेका भाइ दीपकलाई छुटाउन खोज्दा, डडेल्धुराका लगानी बोर्ड पूर्वसीईओ सुशील भट्ट पनि पक्राउ

डडेल्धुरा:  डडेल्धुरा अजयमेरु गाउँपालिका–३ पुख्र्यौली घर भएका प्रभावशाली भट्ट दाजुभाइ दुवै जना कानुनी फन्दामा परेका छन् ।

जेलमा रहेका भाइ दीपक भट्टलाई छुटाउनका लागि अनुचित प्रभाव र वातावरण बनाउन खोजेको आरोप लागिरहेका बेला लगानी बोर्डका पूर्वप्रमुख कार्यकारी अधिकृत (सीईओ) समेत रहेका दाजु सुशील भट्टलाई काठमाडौँ जिल्ला प्रहरी परिसरको टोलीले शनिबार ललितपुरको सानेपाबाट पक्राउ गरेको छ ।

प्रहरी स्रोतका अनुसार सुशील भट्टलाई मुख्य गरी सम्पत्ति शुद्धीकरण (मनी लाउन्डरिङ) को कसुरमा नियन्त्रणमा लिइएको हो ।

यसका साथै, कानुनी कारबाहीमा परेका भाइ दीपक भट्टलाई जेलमुक्त गराउन शक्ति र स्रोतको दुरुपयोग गर्दै बिचौलियाको भूमिका खेलेको विषयमा समेत प्रहरीले उनीमाथि सूक्ष्म अनुसन्धान अघि बढाएको छ ।

व्यापारिक तथा राजनीतिक वृत्तमा प्रभावशाली मानिने भट्ट दाजुभाइमध्ये भाइ दीपक पक्राउ परे लगतै उनलाई जोगाउने कसरतमा लागेका दाजु सुशीलसमेत पक्राउ परेपछि यो प्रकरण थप पेचिलो बनेको छ ।

सुशील भट्टलाई हाल काठमाडौँ जिल्ला प्रहरी परिसरको हिरासतमा राखेर अनुसन्धान अगाडि बढाइएको प्रहरी अधिकारीहरूले जनाएका छन् ।