काठमाडौँ, १५ माघ ।
बेलायतमा मुख्यालय भएको सूचना प्रविधि सम्बन्धी सेवाप्रदायक परामर्शदाता कम्पनी, जेनेस सलुशनले नेपालका बैकिङ क्षेत्रका अगुवाहरुसंग एक अन्तरक्रिया आयोजना गरेको छ।

अमेजन वेब सर्भिसेज  (एडब्लुएस)को सहयोगमा  जेनेस सलुशनद्वारा  गत आइतबार बैकिङको भविष्यः भोलिका लागि रुपान्तरणको शुरुआत विषयमा आयोजित अन्तरक्रियामा नेपाल राष्ट्र बैंक, नेपाल बैंकर्स एसोसियसन तथा क एवम् ख वर्गका बैंकका प्रमुख कार्यकारीहरुको सहभागिता थियो। अन्तरक्रियामा सहभागीहरुले नवपरिवर्तन, सहकार्य तथा बैकिङ उद्योगका सामु  रहेका प्रमुख मुद्दाहरुबारे छलफल गरेका  थिए।

कार्यक्रमलाई सम्बोधन गर्दै नेपाल राष्ट्र बैंकका गभर्नर महाप्रसाद अधिकारीले उत्थानशील तथा नवपरिवर्तनमा आधारित बैकिङ सेवा तर्फ अगाडी बढ्नु पर्ने बताए ।  

उनले नेपालको वित्तीय प्रणालीमा विश्वसनीयता, दक्षता र ग्राहकलाई गुणस्तरीय सेवा प्रदान गर्न डिजिटल पूर्वाधारको विकास गर्न र नीतिनियमहरुमा सुधार ल्याउन राष्ट्र बैंकले काम गरिरहेको जनाए ।  

उनले  बैंकहरुलाई  साइबर सुरक्षा प्रणालीलाई बलियो बनाउन थप ध्यान दिन सुझाव पनि दिए।

त्यस्तै नेपाल बैंकर्स एसोसियसनका अध्यक्ष सन्तोष कोइरालाले ग्राहकको रुची र चाहना अनुसार बैकिङ क्षेत्रले आफुलाई रुपान्तरण गर्दै लागेको जनाउंदै साइबर सुरक्षा जस्ता विषयमा अरु बढी चनाखो भएर अगाडी बढ्नु पर्ने बताए । 

कार्यक्रममा जेनेस सलुशनका प्रमुख कार्यकारी अधिकृत अञ्जनी फुयाँलले बैकिङ क्षेत्रमा भै रहेका नयाँ विकासक्रम बारे चर्चा गर्दै पुराना प्रणालीहरुलाई हटाएर समय सुहाउँदो प्रणाली अपनाउनु पर्ने बेला आएको बताए ।

 उनले नेपालको बैंकिंग क्षेत्रले पनि  क्लाउड पूर्वाधार, कृत्रिम बौद्धिकतामा आधारित धोखाधडी पत्ता लगाउने प्रणाली तथा डिजिटल माध्यमबाटै ग्राहकहरुको समस्या सम्बोधन गर्न  स्मार्ट तथा थप  सुरक्षित बैंकिंग भविष्य तर्फ अगाडी बढ्न सुझाव दिए ।

जेनेस सलुशनका प्रमुख प्रविधि तथा प्रमुख सूचना सुरक्षा अधिकृत निरन्जन कुँवरले साइबर सुरक्षा चुनौतीहरु बारे विस्तृत प्रस्तुति गर्दै अहिले देखिएका चुनौतीहरुसंग जुध्न वित्तीय संस्थाहरुले अपनाउनु पर्ने सुरक्षा उपायहरुबारे जानकारी दिए ।

 नेपाल प्रहरीको साइबर ब्युरोका सूचना अधिकृत प्रहरी उपरीक्षक  दिपक अवस्थीले  अन्तरराष्ट्रिय साइबर अपराधीहरुले संगठित रुपमा बैंक तथा वित्तीय संस्थाहरुलाई निशाना बनाउन थालेको जनाउँदै थप सुरक्षा अपनाउन सुझाव दिए।

कार्यक्रममा प्रस्तोताहरुले सहभागी बैंकरहरुका जिज्ञासाहरुको जवाफ दिएका थिए।

युकेमा मुख्यालय रहेको जेनेस सलुशनले व्यवसायहरुलाई सूचना प्रविधि सम्बन्धी परामर्श दिनुका साथै रुपान्तरणकारी डिजिटल इकोसिस्टमु तयार गरेर तिनका प्राविधिक लक्ष प्राप्त गर्न पनि सघाउँदै आएको छ ।  जेनेस सलुशनको  नेपाल, बंगलादेश, फिनल्याण्ड, अमेरिका, नाइजेरिया  लगायत १० ओटा मुलुकहरुमा कार्यालय छन्।