धनगढी, ९ चैत ।
नेपाल ईन्स्योरेन्स प्रोफेसनल सोसाईटी(निप्स) को आयोजना तथा नेपाल ईन्स्योरेन्स एण्ड रिस्क म्यानेजमेण्ट एशोसिसयन(निरमा) को सहकार्यमा जोखिम व्यवस्थापन र बीमामा समसामयिक मुद्दाहरू सम्बन्धी गोष्ठी शनिवार धनगढीमा सम्पन्न भएको छ ।

गोष्ठीका प्रमुख अतिथि सुदुर पश्चिम प्रदेशका आर्थिक मामिला राज्य मन्त्री प्रकाश बमले बीमा दुख पर्दाको साथी भएकोले बीमामा सबैको पहूँच सुनिश्चित गर्नुपर्ने बताए ।

“बीमा दुख पर्दाको साथी हो । तर बीमा भित्रका समस्या र बीमाका बारेमा जानकारीको अभावमा बीमामा सबै नागरिक जोडिन सकेका छैनन्,” आर्थिक मामिला राज्यमन्त्री बमले भने, “प्रदेश सरकार बीमा सम्बन्धि सचेतना र बीमामा सबैको पहूँच सुनिश्चित गर्न सहकार्य र सहयोग गर्न तयार छ । ”

कार्यक्रममा विशिष्ट अतिथिद्वय नेपाल बीमा प्राधिकरण सुदुर पश्चिम प्रदेशका प्रदेश प्रमुख हृदयश्वर पण्डित र नेपाल री-ईन्स्योरेन्सका प्रमुख कार्यकारी अधिकृत सुरेन्द्र थापाले बीमाको महत्वका बारेमा चर्चा गरे । 

नेपाल ईन्स्योरेन्स प्रोफेसनलस सोसाईटी कैलालीका अध्यक्ष सुनील श्रेष्ठले स्वागत मन्तव्यसंगै गोष्ठीको औचित्यमाथि प्रकाश पारेका थिए ।

निरमाका अध्यक्ष प्रा. डा.रविन्द्र घिमिरेको सभापतित्वमा सम्पन्न कार्यक्रमको संचालन निप्स कैलालीका सचिव नर बहादुर नेगीले गरेका थिए । गोष्ठीमा जीवन तथा निर्जीवन बीमा र लघु बीमा कम्पनीका गरी एक सय २० जना कर्मचारीहरुको सहभागिता रहेको थियो ।