देशका कर्णधारहरूले सृजनशील काम सिक्दै जानुपर्छ : प्रदेश प्रमुख मियाँ

कैलाली । सुदूरपश्चिम प्रदेश प्रमुख नजिर मियाँले बालबालिकाहरू सृजनशील हुनुपर्ने बताएका छन् । लुम्बिनी एसिया इन्टरनेस्नल डिप्लोमेट्स सोसाइटीले आयोजना गरेको मोडल युनाइटेड नेशन कार्यक्रममा प्रदेश प्रमुख मियाँले बालबालिकाहरू सृजनशील हुनुपर्ने र सिर्जनाबाटै केही नयाँ गर्न सकिने बताएका थिए ।

युवा विद्यार्थीलाई अन्तर्राष्ट्रिय कूटनीति, संवाद र समस्याको समाधानका सीपहरूको लागि आयोजना गरिएको कार्यक्रमले विद्यार्थीहरूलाई निकै ठूलो फाइदा पुग्ने बताए ।

चैतन्य पाठशालामा सुरु भएको कार्यक्रम शनिवारसम्म जारी रहने छ । धनगढीका बिभिन्न विद्यालयका कक्षा ७ देखी १२ सम्म पढ्ने ११५ जना विद्यार्थी सहभागी छन् । चैतन्य पाठशालाका प्रमुख कार्यकारी अधिकृत (सीईओ) गणेश जोशीले यस्ता गतिविधिहरूले विद्यार्थीहरूमा थप नयाँ कुरा सिक्ने अवसर प्राप्त हुने बताएका थिए । 

युवाहरूको क्षमता अभिवृद्धि गर्न, बोल्ने नेतृत्वको विकास गर्न, विश्वव्यापी कूटनीतिबारे जानकारी दिन कार्यक्रम महत्त्वपूर्ण हुने आयोजकले जनाएको छ । कार्यक्रममा युवा विद्यार्थीलाई अन्तर्राष्ट्रिय कूटनीति, संवाद र समस्याको समाधानका सीपहरूबारे जानकारी गराइने छ ।