कैलाली । २० गते स्थानीय विष्णा भुलको बाख्रा हराएको थियो । त्यसको ३ दिनपछि अर्थात् २३ कात्तिकमा स्थानीय अभियन्ता तथा पत्रकार सुरेश भुलको मेडिकल बाहिर भेटियो । कैलाली गौरीगङ्गा नगरपालिका-११ कान्तिपुर टोल बस्ने भुललाई एक पक्षले उक्त बाख्रा चोरेको आरोप लगायो ।

सुरेशले भने ‘शौचालयमा भेटिएको बाख्रा जसको हो उसैले लैजान्छ’ भन्दै सबैले देख्ने ठाउँमा बाँधिदिएको बताए । विषय यत्तिमा रोकिएन- बाख्राका धनीहरूले सुरेशले नै बाख्रा चोरेको जिकिर गर्‍यो । वडा कार्यालय र प्रहरीसँग पनि बाख्रा चोरेको भन्दै सुरेशलाई ३० हजार तिराउने सहमति भयो । तर, २४ गते १ लाख मागियो । त्यही निहुँमा निर्घात कुटपिट भयो ।

‘हाम्रो पक्षबाट बोलिदिने कोही भएन । हूलले जबरजस्ती ३० हजार तिराउने कुरा गर्‍यो ’, सुरेशका एक आफन्तले भने ‘ऊ दोषी नहुँदा पनि भीडको दबाबमा ३० हजार तिर्न सहमत भयौँ तर, पछि एक लाख माग्दै कुटपिट भयो ।’

२३ गते ३० हजार तिराउने सहमति गरेर २४ गते थप रकम माग्दै सुरेशमाथि कुटपिट भएको सुरेशका परिवारले बताउँछन् ।

‘८\१० जनाले नराम्ररी हिर्काए । हामीले प्रतिकार गर्न सक्ने अवस्था थिए राति नै धनगढीको निसर्ग अस्पताल गरेका थियौँ बिहान उहाँको मृत्यु भयो’, आफन्तले भने ।

कुटपिटपछि अस्पताल भर्ना भएका सुरेशले साथीहरूसँग म्यासेजमा आफूमाथि प्रहरीसहितको मिलेमतोमा अन्याय भएको बताएका थिए ।

‘पुलिसहित मिलेका छन् मसुरियाको मेरो ठाउँमा कोही पनि भएन ’, उनले ग्रुपमा पत्रकारको ह्वाट्सएप ग्रुपमा लेखेका छन् ‘वडाध्यक्षसहितको मिलेमतोका भएको हो यो सबै । ’

‘भोलि जिल्ला अदालतमा मुद्दा दिन्छु’ भनेका सुरेश भोलि देख्न नपाउँदै अस्ताए ।

‘नियोजित ढंगले हत्या गरियो’

राष्ट्रिय दलित पत्रकार संघ कैलालीका सहसचिव रहेका उनी सूचनाको हकका लागि राष्ट्रिय महासङ्घ कैलाली जिल्ला सदस्य पनि हुन् । उनी केही समय अघिदेखि अन्याय, भ्रष्टाचार र अनियमितताको विषयमा सूचना माग्दै, वकालत गर्दै र समाचार लेख्दै आइरहेका थिए ।

सुदूरपाटी अनलाइनमा आबद्ध सुरेश सुशासनका विभिन्न विषयहरूमा बोल्दै आइरहेका थिए । सूचनाको अभियन्ताका रुपमा भ्रष्टाचारविरोधी अभियानमै लागेको हुँदा उनको नियोजित ढंगले हत्या गरिएको पत्रकार महासंघ सुदूरपश्चिम अध्यक्ष योगेश रावल बताउँछन् ।

‘विवादको विषय बाख्रा हराएको र भेटिएकोबाट सुरू भएपनि मरणासन्न हुनेगरि कुटपिट गरेको विषय त्यो होइन । बाख्राको विषय सहमति भइसकेपछि हुल बाँधेर कुटपिट गर्नु भनेको नियोजित ढंगले हत्या गर्न खोज्नु रहेको देखिन्छ । कुटपिटमा संलग्नहरू बाख्रा धनीसँग सरोकार नराख्नेहरू पनि रहेको हुँदा पनि हत्या नियोजित देखिन्छ’, अध्यक्ष रावलले भने, ‘घटनाको सत्य तथ्य छानबिन गर्दै दोषीमाथि कडा कारवाही हुनुपर्छ । ’

सूचनाको हकका लागि राष्ट्रिय अभियानका प्रदेश अध्यक्ष पुष्प जोशीले पनि विभिन्न सङ्घ संस्था निकाय र व्यक्तिहरुको विषयमा वकालत गरेको, सूचना माग गरेकै कारण उनको हत्या गरिएको दाबी गर्छन् ।

‘भ्रष्टाचारको विरुद्धमा आवाज उठाएकै कारण उनको हत्या भएको हुनसक्छ । घटनाको सत्य तथ्य छानबिन गरेर दोषीमाथि कडा कारवाही हुनुपर्छ’, अध्यक्ष जोशीले भने ।

घटनापछि ९ जनाविरुद्ध किटानी जाहेरी परेको छ । तीमध्ये ८ जना नियन्त्रणमा आइसकेका छन् । फरार एकजनाको खोजी भइरहेको प्रहरीले बताएको छ ।

‘घटनाबारे हामी अनुसन्धान गरिरहेका छौँ’, जिल्ला प्रहरी कार्यालय कैलालीका सूचना अधिकारी प्रहरी नायव उपरीक्षक कविन्द्र बोहराले भने । सुरेशले आक्रमणपछि मसुरियाका प्रहरीसहितको मिलेमतो भनेर ग्रुपमा लेख्दा पनि अहिलेसम्म ती प्रहरी अधिकारीमाथि छानबिन नभएको भन्दै आलोचना भएको छ । जिल्ला प्रहरी कार्यालय कैलालीका प्रवक्ता भने अनुसन्धान भइरहेको भन्दै विभिन्न विषय पत्ता लाग्दै जाने बताउँछन् ।

पत्रकार महासंघ केन्द्रले पनि उक्त घटनाको छानबिनको लागि मिसन टोली खटाएको छ । केन्द्रीय सचिव हेमकर्ण विकको संयोजकत्वमा खटिएको मिसन टोलीले १५ दिनभित्र घटनाको सत्य तथ्यसहितको प्रतिवेदन पेश गर्नेछ ।